RIBEIRA > O grupo municipal do PSOE presentou unha pregunta ó pleno do concello en relación ó proceso de adaptación do PXOM á Lei do Solo de 2002.
Na pregunta rexistrada no concello, os socialistas queren saber en que punto se atopa o proceso para a contratación dunha asistencia técnica que permita a actualización do actual plan urbanístico. Interésanse ademais por saber se o concello ten solicitado algún tipo de subvencións para acometer os traballos de adaptación do PXOM.
A este respecto, o portavoz do PSOE ribeirés, Toño Novoa, explicou que Ribeira conta cun ordeamento obsoleto, que non cumpre coa actual normativa en materia urbanística e ambiental, o que trae consigo problemas para os veciños.
Entrega simbólica
Para chamar a atención sobre o actual modelo urbanísitco de Ribeira, os socialistas quixeron facer entrega dunha árbore ó concello para que sexa prantada no parque de Pedra Pateira.
Con este acto simbólico, agardan que tanto a administración como os propios veciños tomen conciencia da necesidade de avanzar cara un modelo de cidade sostible con maior calidade de vida para os seus habitantes.
{flowplayer}barbanza/adaptacionpxom.flv{/flowplayer}
Redacción Barbanza