PONTEVEDRA > Por segunda vez os veciños afectados pola modificación da estrada PO-504, ó seu paso pola Vichona, Sanxenxo, volveron a concentrarse ante a delegación …
…da Consellería de Política Territorial en Pontevedra. Xa estiveron alí onte pero non puideron falar coa delegada, María Isabel Domínguez, porque esta se atopaba nunha xuntanza en Santiago. Esta mañá a resposta foi a mesma, polo que a indignación entre os veciños, que só piden que os reciban, era moi alta.
A súa perseverancia non lles impediu que hoxe tiveran que marcharse, por segunda vez, para a casa sen a confirmación dunha cita coa delegada da Consellería de Política Territorial. Unha xuntanza na que pretenden trasladarlle as súas reinvindicacións sobre o proxecto que a Xunta ten planeado para a estrada autonómica, que une Vilalonga con Sanxenxo.
O proxecto inicial da Consellería, e que ós veciños rexeitaran xa hai doce meses, introduciu variacións que lles seguen parecendo insuficientes. Por parte da delegación de Política Territorial, aseguraron xa onte que están dispostos a dialogar cos afectados, pero que non permitirán que se faga política cun asunto tan importante para a seguridade das persoas.
O corte do acceso das estradas que conducen ata a sede do departamento autonómico tamén lle afectou a un establecemento do lugar, a clínica de rehabilitación Torrado, que se solidarizou cos veciños lodo de non teren os seus clientes aceso ata as súas instalacións.
A de hoxe foi unha mañá moi intensa de protestas ás portas da delegación de Política Territorial. Á concentración dos veciños de Vilalonga uníuselle a dos traballadores de Extraco, a empresa contratada pola Xunta para o mantemento das estradas na zona sur de Pontevedra, que levan case un mes en folga.
Redacción Salnés