SALNÉS> Os remeiros de Mecos Mondariz ondearon esta fin de semana a Bandeira que os acredita como campións do Teresa Herrera, na Coruña. Os grovenses fixeron o mellor tempo sobre o segundo clasificado, o Chapela. Na xeral continúa de líder Cabo de Cruz.
O club de remo Mecos proclamouse campión na sétima Bandeira Teresa Herrera, que se disputou esta pasada fin de semana na Coruña. E fíxoo tras facer o mellor tempo, sumando a contrarreló do sábado e a regata do domingo. Os remeiros grovenses conseguiron o sábado 14 segundos de vantaxe sobre o segundo clasificado, o Chapela, que a piques estivo de remontar na manga disputada o domingo.
Mecos controlou a regata ata a terceira ciaboga, onde os de Chapela marcaban unha distancia a favor de 13 segundos, a só 2 de superar ós do Grove. No último largo, Chapela e Mecos mantiveron o pulso ata a meta e os de Redondela entraron primeiros, pero só cunha diferenza de 10 segundos, insuficiente para arrebatarlle o trunfo á mequiña.
A clasificación xeral continúa comandada por Cabo de Cruz, seguido por Náutico de Vigo e Chapela. A próxima regata de liga será dentro de 15 días, xa que esta fin de semana, dispútase o campionato de España de Traiñeiras, onde o club Mecos será o único representantes da Liga Galega.
Redacción Salnés
