RIBEIRA> A agrupación local do BNG vén de solicitar ó executivo a revisión dunha licenza para a construción de dezasete vivendas en Corrubedo.
{flowplayer}barbanza/denunciaurbanisticacorrubedo.flv{/flowplayer}
Con esta iniciativa, a agrupación do BNG de Ribeira faise eco das reiteradas denuncias da asociación veciñal ‘Campo da Agra’ nas que reclaman a paralización das obras e a revisión da licenza municipal pola que se autorizou a construción dunha urbanización de dezasete vivendas con alturas de edificación de soto, planta baixa, unha planta e baixo cuberta.
Dende o BNG ribeirés salientan que a meirande parte do solo onde se pretende construír esta urbanización está cualificado no Plan Xeral de Ordenación Municipal de Ribeira como norma de protección de Espazos Naturais.
A outra parte do solo, din os nacionalistas, ten a calificación de urbano polo que cren que é necesario delimitar sobre o terreo os límites de ámbalas dúas zonas.
Resolución da Xunta
Ademais do PXOM, desde esta agrupación cren que se debería ter en conta á hora de revisar a licenza a resolución da Xunta de 2008 que declarou ilegais parte das obras dun solar lindeiro, ao considerar que a liña límite da ordenanza é a que se debe seguir para delimitar o planeamento aplicable aos terreos e non a liña de delimitación de núcleo.
Os nacionalistas ribeireses lamentan que o executivo local prime criterios de maior edificabilidade en detrimento da dotación de espazos públicos e da protección ambiental.
Redacción Barbanza
