BOIRO> Un incendio arrasou preto de cincuenta hectáreas en Bealo. A calor e o vento favoreceron o avance do lume que estivo a piques de afectar a vivendas.
{flowplayer}barbanza/incendiobealo.flv{/flowplayer}
O lume sorprendía pasadas as nove da mañá ós veciños deste pequeno núcleo entre A Galea e Armada, na parroquia boirense de Bealo.
Malia que finalmente non chegou a afectar a ningunha vivenda, vivíronse momentos de pánico ante o avance das lapas que avivadas polo forte vento chegaron ás inmediacións de varias casas e fincas.
Ó redor das catro e media da tarde, Medio Rural daba por controlado o lume que, segundo a valoración inicial, afectou ó redor de cincuenta hectáreas de monte.
Amplo dispositivo
No operativo para a extinción do incendio participaron cinco helicópteros, dous avións, once motobombas, trece brigadas, cinco axentes forestais, dous grumir e un técnico.
Ademais durante toda a xornada, efectivos dos parques de bombeiros da comarca, participaron como persoal de apoio para evitar que o lume afectase ás vivendas.
Redacción Barbanza
