A lei de Costas beneficiará a un cento de afectados dos Areeiros

     RIBEIRA> A modificación da lei de Costas permitirá legalizar ó redor de oito mil vivendas en Galicia. Entre elas as dos núcleos tradicionais costeiros como o lugar dos Areeiros, en Castiñeiras.

    {flowplayer}barbanza/areeirosleicostas.flv{/flowplayer}

    A nova lei de Costas reduce o deslinde de protección de cen a vinte metros en determinados supostos. Desta modificación beneficiaranse os propietarios dos Areeiros, un pequeno núcleo da parroquia ribeirense de Castiñeiras, que levaban anos loitando pola desafectación das súas propiedades. O colectivo veciñal sempre defendeu a posibilidade de construír na mesma liña xa consolidada e de xeito acorde ás edificacións existentes.

    Aínda que a consideran beneficiosa para este tipo de núcleos tradicionais, entenden que o plantexamento da lei pode resultar prexudicial nalgúns supostos xa que só contempla dúas distancias. Neste sentido piden que non se equipare a construción de vivendas unifamiliares en zonas xa consolidadas a outro tipo de prácticas urbanísticas que poidan supoñer un risco medioambiental.

    Dependerá das administracións encargadas de autorizar as construcións que a lei se aplique correctamente en cada caso. Á espera de ver como se materializa a nova normativa, os veciños dos Areeiros celebran a boa resolución dun conflito que se prolongaba xa durante moitos anos e que mesmo os levara daquela a optar pola vía xudicial sen éxito.

    Redacción Barbanza