Esta mañá retomouse o dispositivo de busca na contorna do Río Umia na procura dun corpo que, supostamente, veu onte á tarde un veciño de Caldas flotando na auga. A alerta deste veciño coincidiu coa desaparición dun usuario da Residencia caldense, un home de 77 anos e natural de Melide que desde o ano 2007 vivía no centro e que se sospeita podería coincidir con ese corpo que avistaron no río.
Segundo fontes da residencia, o ancián saíu das instalacións onte en torno ás cinco da tarde e sobre as seis, algunhas testemuñas vírono a carón do río Umia, un lugar por onde adoitaba pasear a miúdo. Sospéitase que podería ter esvarado e caído ó río de corresponderse con el o corpo que supostamente viu no río o particular que alertou ó 112. De inmediato se puxo en marcha un dispositivo de emerxencia composto por Garda Civil, Policía Local de Caldas, así como voluntarios de Protección Civil desta localidade, Cuntis, Portas e Vilanova, zona ata que se calcula que puido chegar o corpo tendo en conta o estado das augas e as correntes que levaba o río. O dispositivo de busca iniciado onte suspendíase pouco antes de media noite pola falta de luz e esta mañá retomouse. Peinouse a zona desde as inmediacións da antiga nave de Brenntag, en Bemil, o entorno da fábrica de Clesa, Godos, ata os concellos de Vilanova e Cambados.
Imaxes da enchente do Río Umia o seu paso polas Aceñas (Vilanoviña-Meis).
{gallery}ano2014/01xaneiro/17/Rio_Umia{/gallery}
