POBRA> Está organizado pola mancomunidade de Arousa Norte.
Ribeira, A Pobra, Boiro e Rianxo, os catro concellos que conforman a mancomunidade, compracéronse en presentar o primeiro campionato de paddle board, que se vai desenvolver na praia de Coroso o 13 e 14 de setembro. Esta competición estará dirixida tanto a profesionais como a afeccionados. Ademais, SUP Arousa Norte anima a todos os visitantes a coñecer máis acerca desta modalidade do surf, mediante bautismos de mar gratuítos. En España, o paddle board é aínda un deporte descoñecido para moitos, pero como ben explicou o presidente da mancomunidade ten a súa orixe moitos anos atrás. Con este campionato búscase potenciar as posibilidades da ría de Arousa, xa que as distintas praias son idóneas para o desenvolvemento da actividade, e tamén dar a coñecer un deporte sinxelo entre toda a veciñanza. Os que non se animen a subir a táboa poderán ver a proba técnica desde terra. Na praia de Coroso, concretamente no espazo habilitado para o campionato, haberá unha zona de exposición de materiais deportivos de distintas marcas comerciais.
