O berberecho volverá a ser a estrela do ‘Vai de Tapas’

    NOIA> A cita arrancará este próximo venres, prolongándose durante toda a fin de semana. na iniciativa tomarán parte uns 15 establecementos hostaleiros adheridos a Noia Histórica. O éxito de edicións anteriores foi unha das principais razóns que levou á asociación Noia Histórica a volver a organizar o ‘Vai de Tapas’. A iniciativa desenvolverase esta vindeira fin de semana, venres 12, sábado 13 e domingo 14 de decembro coa participación dun total de 15 establecementos hostaleiros da localidade. A través desta iniciativa, para a que contan coa colaboración doutras entidades, entre elas a propia confraría de pescadores, pretenden exaltar un dos produtos locais por excelencia, como é o berberecho, ó tempo que dinamizar tamén a importante actividade hostaleira da vila. Os locais participantes no ‘Vai de Tapas’ competirán entre eles para decidir quen elaborou a mellor tapa. Unha decisión que deberán tomar os propios clientes dos establecementos a través dos seus votos. E visto o visto ,atendendo á propia composición dos pratos, a elección será complexa. Para os clientes haberá ademais diversos sorteos de agasallos, e os locais gañadores optarán a un primeiro premio de 250 euros para poder gastar en produtos de Estrella Galicia ou varios lotes de ibéricos.