VILAGARCÍA> O alcalde electo Alberto Varela apura as xestións para cadrar entre mañá e o venres a segunda rolda de contactos con BNG e Esquerda Unida de cara á constitución da nova corporación o sábado. Esta mañá reuniuse co alcalde en funcións, o popular Tomás Fole, para tratar o traspaso de poderes e algunhas cuestións que o executivo saínte deixa en marcha ou pendentes, sobre todo no tocante a investimentos. O encontro, que Varela cualificou de ‘cordial’, veuse de xeito distinto desde a óptica dos populares. Mediante nota de prensa, Tomás Fole lamenta a ‘negativa’ dos socialistas a acceder nin sequera a falar sobre un posible acordo co PP para ‘dar estabilidade política ó futuro goberno’. Segundo Varela, non é que o PSOE se negara, senon que desde un inicio os socialistas deixaron claro que os posibles pactos naturais que pechasen serían con forzas progresistas, polo que na reunión de hoxe nin sequera se entrou a valorar a posibilidade de negociacións co PP. No que si concordan alcalde saínte e entrante é o ofrecemento e disposición das dúas partes para que o traspaso de poderes se realice de xeito tranquilo e coordinado.
Inicio Salnés - Caldas
