Tensión e moita expectación en Meis, que aproba por unanimidade situar o ambulatorio na Parga

MEIS> Meis ofrecerá á Xunta o terreo da Casa da Parga para a construción do novo centro de saúde. A proposta foi aprobada onte por unanimidade nun pleno que xerou moita expectación entre a veciñanza. Preto dun cento de persoas acudiu como público á sesión extraordinaria. A alcaldesa aproveitou para defende-la súa xestión fronte ás críticas da oposición. O exalcalde popular mesmo chegou a enfrontarse en varias ocasións co público.

Foi un pleno con moita expectación, con momentos de tensión e mesmo con amagos de tumba-la proposta do goberno local. Finalmente, os tres grupos aprobaron por unanimidade ofrecerlle á Xunta o terreo da Casa da Parga para a construción do novo centro de saúde. A alcaldesa quixo levar a Pleno esta cuestión, logo de que o Sergas paralizase o protocolo asinado o mes pasado, no tempo que tardaban en valorar unha localización alternativa na Rochela. O PP acusou a Marta Giráldez de xestionar mal este asunto, pero de ser moi hábil á hora de mobiliza-los veciños.

Esta intervención de José Luis Pérez non gustou ao cento de veciños que ateigaba o Concello. Tampouco á alcaldesa. O enfrontamento entre o popular e o público foi indo a máis. Tachou a algún dos presentes de ‘hooligan’ e mesmo chegou a responder algunhas acusacións dos veciños, que reprochaban que non tivese feito nada por mellora-la sanidade en Meis nos seus 20 anos de goberno. A alcaldesa aproveitou a oportunidade, contrapoñendo o feito polo seu goberno neste mandato fronte a etapa do PP.

O BNG, pola súa banda, asegurou estar de acordo en contruí-lo ambulatorio tanto na parcela da Rochela como a da Parga. O seu voceiro tentou darlle ao tema unha nova volta de torca, propoñendo a convocatoria dunha consulta popular que decidise a localización final.

Pero a alcaldesa retrucoulle que xa chegara o momento de pronunciarse e votar pola proposta sobre a Parga que estaban a debater. E aínda que os nacionalistas avanzaron un ‘non’ e os populares mesmo tentaron para-la sesión para manter un encontro co Bloque e decidi-lo sentido do seu voto, finalmente todos votaron a favor. Iso si, cun matiz:  ofrecerase o terreo sen incluír no texto a mención ao protocolo xa asinado co Sergas.

E así, cando xa parecía que a batalla estaba perdida, a alcaldesa fíxose co apoio de todo o Pleno e co aplauso do público. Un aplauso ao que despois se uniron, tanto os concelleiros do goberno como os dos dous grupos da oposición.