POBRA> A dúas atletas do A.A.D. Barbanza foron recibidas no concello polos éxitos acadados nos recentes campionatos de España de Atletismo ó aire libre celebrados en Castellón. O alcalde da Pobra do Caramiñal, Xosé Lois Piñeiro, e á edil delegada de Deportes, Genoveva Hermo, xunto a outros membros da corporación municipal, recibiron oficialmente este mediodía no concello ás atletas da Asociación de Atletismo e Deportes do Barbanza, Lidia Parada e Iria Forján, para felicitalas e recoñecerlle publicamente os logros acadados nos últimos Campionatos de España de Atletismo ó aire libre celebrados esta pasada fin de semana en Castellón. Lidia Parada proclamouse campioa de lanzamento de xavelina en categoría absoluta, mentres que Iria Forja, rematou nun máis que meritorio duodécima posición na final de lonxitude. Despois de asinar no libro de honra, a recepción oficial continuou cun emotivo acto no salón de plenos do concello. A sala atopábase totalmente ateigada de xente, sendo numerosos os familiares, amigos e veciños en xeral que non quixeron perderse nada desta homenaxe ás dúas deportistas. O rexedor pobrense felicitou ás dúas atletas polos éxitos conseguidos, dándolle a súa máis que sincera noraboa, animándoas a seguir traballando como ata o de agora e mostrándose orgulloso de que levasen o nome da Pobra a unha posición relevante no mundo do deporte. Visiblemente emocionadas e tamén nerviosas, as dúas deportistas agradeceron o recoñecemento do concello e con el o de todos os veciños da Pobra. As sorpresas para as dúas deportistas non acabaron aquí, xa que o alcalde aproveitou o acto para anunciar que Lidia Parada será ademais este ano a pregoeira das festas do Carmen dos Pincheiros que se celebrarán a fin de semana do 21 ó 24 de agosto.
Inicio Barbanza - Muros - Noia
