A un paso da 2ªB

BOIRO> Paso adiante do Club Deportivo Boiro. A súa vitoria este domingo ante o Caudal por dous goles a cero, no partido de ida da fase de ascenso, sitúano un pouco máis preto da 2ªB. O Club Deportivo Boiro está a tan só noventa minutos de converterse en novo equipo de 2ªB. A súa vitoria por dous goles a cero ante o Caudal de Mieres no partido de ida da fase de ascenso sitúano máis preto dese soño. Algo verdadeiramente impensable hai uns anos e que hoxe ten máis de realidade. Como non podía ser doutro xeito, o municipal de Barraña, que volvía a encherse para a ocasión, vibrou co seu equipo. Dende o saque inicial os boirenses intentaron levar o peso do partido, ante un rival complicado e con moito oficio como é o conxunto asturiano. Deles foron a maior parte das ocasións neste período. Aínda así o gol tardou en chegar. Transcorrera xa a media hora, cando unha combinación dos xogadores de ataque locais, onde reside boa parte do talento do Boiro, propiciaba un centro de Herbert e un certeiro remate de Romay. Era o un a cero. Un resultado co que se chegaría ó descanso. Na segunda metade máis do mesmo. O Boiro levando a iniciativa no xogo e o Caudal defendéndose ben e tratando de saír á contra, aínda que se inquietar á zaga local nin tampouco o meta Reguero. Xa cando na grada daban por bo o resultado, no tempo de desconto, chegaría o segundo gol para os boirenses. Un saque de falta botado por Herbert era rematado na área pequena polo central Borja. O tanto facía xustiza ó acontecido ó longo dos noventa minutos. E na grada o gol viviuse de xeito especial, polo que significaba. A renda de dous cero parece a priori suficiente. Máxime cando o rival debe marcar tres goles para pasar a eliminatoria e que o Boiro non consiga ningún, algo verdadeiramente impensable, dado a enorme potencial dos de José Luís Lemos, que durante a tempada acostumaban ademais a facer mellores encontros fóra de Barraña. Saberémolo o próximo domingo. Partido histórico para o Club Depoortivo Boiro que podería converterse matematicamente coma novo equipo de 2ªB.