Os emigrantes retornados gáñanlle a Facenda dous novos casos

VILAGARCÍA> Os emigrantes retornados continúan gañándolle batallas a Facenda. Esta mañá anunciaron dúas novas sentenzas favorables, nos que a xustiza lles deu –de novo- a razón. Hoxe, un grupo de pensionistas volveron concentrarse en Vilagarcía, ás portas da Axencia Tributaria.

A loita dos emigrantes retornados segue a ve-los seus froitos perante a xustiza. A que eles denominan “batalla de Alemaña” acaba de ver recoñecida perante o Tribunal Superior de Xustiza de Galicia con dúas novas vitorias. En total, van xa 24 contencioso-administrativos deste tipo que os emigrantes lles gañaron a Facenda.

Os emigrantes din estar satisfeitos por que a xustiza recoñeza o que, segundo denuncian, o goberno central se nega a recoñecer: que o que eles están vivindo é un auténtico espolio. Aseguran que as súas mobilizacións van continuar ata que todos e cada un dos emigrantes afectados vexan solucionado o seu caso.

Denuncian que o executivo de Rajoy está discriminando ós galegos retornados, empregando dúas varas de medir. Piden ter o mesmo trato que un pensionista xubilado en España, exentos de face-la Declaración da Renda por ingresos inferiores a 22.000 euros.

Ademais das súas xa habituais concentracións mensuais, os emigrantes retornados traballan xa para levar varias iniciativas ó Parlamento de Galicia, coa intención –din- de que a súa voz se acabe escoitando no Congreso dos Deputados.