As procesións do Domingo de Ramos inauguran a Semana Santa no Barbanza

BARBANZA> O Domingo de Ramos dou o pistoletazo de saída á Semana Santa no Barbanza. En Boiro, levouse a cabo a tradicional bendición no cruceiro do Bao mentres que en Porto do Son foi a praza de España a que acolleu este solemne acto coa imaxe de Xesús a lombos da Borriquiña. Un ano máis, o arranque da Semana Santa barbanzá estivo protagonizado polas procesións de Ramos.  A máis madrugadora daba comezo ás dez e media da mañá en Porto do Son. Centos de veciños concentráronse na praza de España para asistir á tradicional bendición presidida pola imaxe de Xesús sobre a borriquiña. Unha hora máis tarde, o párroco de Boiro facía o propio no Cruceiro do Bao. Trala bendición partiu a comitiva procesional que percorreu varias rúas do casco urbano. A pesar de que caeu algún chubasco, o tempo respectou estes primeiros actos da Semana Santa nos que os nenos tiveron especial protagonismo. Ó longo destes días continuarán as celebracións relixiosas con especial énfase a partir do Xoves Santo cando as principais procesións percorrerán tódolos concellos da comarca.