BOIRO> Os parroquiáns de Santiago de Lampón renderon unha emotiva homenaxe a Marcelino Sánchez Somoza, no vinte e cinco aniversario do seu sacerdocio. Unha multitudinaria misa e o posterior xantar, rodeado de amigos e veciños, serviron para brindar unha cálida homenaxe ó párroco. Don Marcelino Sánchez Somoza pode presumir de ser un dos curas máis queridos en todo o Barbanza. Así quedou en evidencia este domingo cando se cumprían vinte e cinco anos dende que se oficiou sacerdote. A igrexa de Santiago de Lampón quedou pequena para acoller ós centos de feligreses que quixeron participar na homenaxe ó seu párroco, do que destacan a súa entrega e humanidade. Ademais de familiares, amigos e autoridades, ata o templo desprazáronse numerosos veciños de Moaña, onde o párroco iniciou a súa carreira así como alumnos e mestres do Instituto Número Un de Ribeira onde imparte clases de relixión. Tamén numerosas autoridades, co alcalde de Boiro á cabeza, quixeron sumarse a esta sentida homenaxe. Rematada a misa, os asistentes desprazáronse ata o restaurante Chicolino para disfrutar dun xantar de confraternidade. Alí, ademais de palabras de cariño e admiración, o sacerdote recibiu numerosos agasallos, entre eles unha placa en lembranza deste aniversario. Don Marcelino tomou a palabra para agradecer as mostras de afecto dos seus parroquianos, nunha data tan especial que coincidía ademais co seu cincuenta cumpreanos. Unha dobre celebración para festexar na mellor compañía.
Inicio BARBANZA