VILAGARCIA> Nos días previos a defuntos moitos son os que se achegan a florerías ou postos de flores que se sitúan en espazos dedicados a tal fin, como o que estes días se sitúa nos arredores da Praza de Abastos de Vilagarcía. O Mercado das Flores estivo hoxe ateigado de persoas que buscan as mellores flores para honrar aos seus familiares xa falecidos.
Este é o Mercado das Flores que estes días está emprazado en Vilagarcía. Diferentes distribuidores e florerías venden flores de todo tipo coas que satisfacer as necesidades dos centos de persoas que buscan como honrar aos seus defuntos.
Nesta primeira xornada de apertura houbo unhas once florerías dispoñibles, que puxeron a disposición dos seus clientes centros feitos ou flores soltas. Estas últimas foron as máis demandadas.
Mañá este mercado abrirá en horario de oito da mañá a oito da noite, sen facer pausa ao mediodía. Sinalar que a apertura o xoves será de nove a dous da tarde.
