CAMBADOS> Cambados conmemorará este ano o Día Europeo do Enoturismo presumindo de recursos. O concello tirará de talentos e produtos locais para celebrar esta efeméride cun showcooking á cambadesa. Os pratos serán elaborados polo chef Antonio Botana, e maridarán con caldos de adegas do municipio. Será o vindeiro 11 de novembro.
Este 2018, o Día Europeo do Enoturismo será máis cambadés que nunca. O concello non deixará pasar de longo esta efeméride o vindeiro 11 de novembro, e celebraráa tirando de talentos e produtos locais.
Esta actividade vén substituír á cata concurso amateur que realizaba en Cambados a Ruta do Viño Rías Baixas, e que este ano se celebrará no Castelo de Soutomaior. Na vila cambadesa, o mestre de cerimonias será o chef Antonio Botana.
Neste “Showcooking á cambadesa”, os pratos elaborados en directo por Botana maridarán cos caldos de tres adegas do concello: Don Olegario, Martín Códax e Lagar da Cachada.
Os interesados en participar nesta cita, que se celebrará o 11 de novembro no Salón José Peña a partires das 12 do mediodía, deberán inscribirse na Oficina de Turismo de Cambados. A actividade é gratuíta, e conta cun máximo de 60 prazas.
