En vigor o límite de 90 km/h nas estradas convencionais

VILAGARCÍA> Os sinais de límite de velocidade a 100 quilómetros por hora desaparecen das estradas do Salnés. Os operarios mudaron esta mañá o último, que se podía ver na nacional 640 en Vilagarcía. Deste xeito, dáse cumprimento á norma que limita a 90 quilómetros por hora a velocidade máxima nas estradas convencionais.

Xa non verán nas estradas da comarca os sinais que limitan a velocidade a 100 quilómetros por hora. Nin no Salnés, nin nos viais convencionais do resto de España. Hoxe entrou en vigor o Real Decreto de Tráfico que reduce a velocidade máxima a 90 quilómetros por hora.

O sinal da Nacional 640 foi só un exemplo das tarefas que se repetiron nas estradas. Outros viais que se ven afectados por esta nova limitación na nosa zona son a circunvalación norte de Vilagarcía, a Vía do Salnés nos treitos Vilagarcía-Vilanova-Cambados-Ribadumia, nos catro carrís da Lanzada- O Bao e no treito de Sanxenxo-O Grove. O obxectivo da medida é reducir os accidentes mortais nestas vías, xa que a maioría dos sinistros son por exceso de velocidade.

Segundo os expertos, esta medida pode reducir ata nun 10% os falecidos na estrada. Na provincia de Pontevedra, foron 19 os mortos en accidentes de tráfico.

Na provincia de Pontevedra mudáronse 19 sinais en estradas titularidade do Ministerio de Fomento cun gasto de 3.000 euros. No caso das autonómicas, foron máis de cen os elementos cambiados cun custo de máis de 13.600 euros.