A ‘Rafaneta’ e a ‘VesTino’ frearon a maioría absoluta de Lores en Pontevedra

Lores leva dúas décadas sendo alcalde de Pontevedra. Hoxe podería obter a súa primeira maioría absoluta

Mitin do BNG

PONTEVEDRA> Os resultados das eleccións municipais en Pontevedra non lle foron sobre rodas ao candidato do BNG á alcaldía, Miguel Anxo Fernández Lores, que recoñeceu que lle saíron mal as contas. Os seus principais competidores tiraron de enxeño precisamente sobre rodas nas campañas electorais. O primeiro foi Rafa Domínguez, do PP, que levou a súa “Rafaneta” polos principais espazos da cidade. O segundo Tino Fernández, do PSdeG-PSOE, que colocou na Peregrina a súa simbólica “VesTino” para achegar as propostas socialistas á cidadanía. As estratexias resultaron e medraron 2 edís os populares e 1 os socialistas.

Lores segue sendo o candidato máis apoiado en Pontevedra. Os prognósticos máis favorables erraron ao sinalar que podería estar, tras 20 anos no poder, ante a súa primeira maioría absoluta. Precisaba 13, tiña 12 e finalmente caeu un: perde apoios, traducidos en 500 votos menos respecto a 2015. Lores recoñeceu que “as contas nos saíron mal” e denunciou a “ofensiva” vivida nos últimos días de campaña “por parte do PP e de ENCE”. Finalmente, falando estritamente de resultados, o mellor non estivo por vir.

O Partido Popular gañou dous edís trala substitución de Jacobo Moreira por Rafa Domínguez e sitúase como principal partido da oposición con 9 edís. Domínguez valorou positivamente os resultados “nun contexto complicado para o noso partido”.

O PSdeG-PSOE, con Tino Fernández como cabeza de cartel, finalmente logrou 4 edís fronte aos 3 de 2015 e amósase seguro de que “teremos un papel fundamental na formación dun goberno de progreso” na Boa Vila.

Pouco éxito entre as candidaturas máis pequenas

A fichaxe da antiga tenente de alcalde Teresa Casal por Marea Pontevedra, coa escisión de Podemos-EU Son En Común, pintaron un panorama desolador. Non sumaron antigos apoios socialistas nin a suma das listas se achegou aos votos obtidos en 2015. Así, as novas formacións de esquerdas desaparecen da corporación provincial. Tampouco Compromiso por Galicia ou Vox puideron obter nada. Pero si Ciudadanos, que agora con Goyo Revenga mantén o lugar que ocupaba María Rey.

DEIXAR UNHA RESPOSTA

Por favor, engade un comentario!
Por favor, engade o teu nome aquí