VALGA> Nesta xornada sucedéronse as mostras de condena polo triplo crime de Valga. Houbo actos en Caldas, Pontecesures, Sanxenxo, Cambados e, por suposto, no lugar do asasinato: en Valga. O alumnado do instituto da localidade concentrouse ás portas do centro. Despois de ler varios textos de apoio ás vítimas, gardaron un minuto de silencio.
A dor polo triplo crime de Valga esténdese por toda a xeografía galega. En moitas localidades do país houbo hoxe actos de repulsa.No Instituto valgués, os alumnos e alumnas concentráronse esta mañá ás porta do centro.
Cun acto sinxelo quixeron amosa-lo seu pesar pola morte das tres mulleres. Dúas das vítimas, Sandra e Alba, estudaran neste mesmo instituto. Tres rapaces foron os encargados de ler cadanseu texto. Un pequeno xesto en defensa da liberdade, da muller e da fin da violencia machista.
Trala lectura, o patio do colexio enmudeceu en recordo das vítimas. Un silencio que rachou co aplauso dos centos de rapaces e rapazas que participaron nesta concentración.
Nesta xornada houbo tamén homenaxes en Caldas, Pontecesures, Sanxenxo ou Cambados. Para mañá, hai convocadas máis dunha vintena de protestas en toda Galicia.
