CAMBADOS> O concello de Cambados pon en marcha a terceira edición dos obradoiros de emprego xuvenil “Cambados emprendedor”. 16 mozos da vila formaranse nos talleres de sistemas microinformáticos ou dinamización cultural. A novidade este ano é que os participantes cotizarán mentres se preparan para o mercado laboral.
Por terceiro ano o concello de Cambados apostará polos obradoiros de emprego “Cambados emprendedor”. Mediante estes talleres formaranse a 16 mozos que estarán divididos en dous módulos. 8 deles cursarán o taller de montaxe e mantemento de sistemas microinfromáticos.
Os outros 8 formarán parte do módulo de dinamización cultural, infantil e xuvenil.
O obxectivo deste obradoiro é formar a mozos desempregados e preparalos para o mundo laboral.
O obradoiro cumpre dúas condicións. Por un lado os mozos perciben unha retribución mentres se forman e por outra, o seu traballo beneficia á veciñanza de Cambados. A gran novidade deste ano é que os participantes dos módulos cotizarán, tal e como se regula na Lei de Orzamentos do Estado.
Mediante unha formación práctica e teórica os participantes acabarán adquirindo un certificado de profesionalidade. Un recoñecemento válido en calquera empresa.
