APE presenta as claves para impulsar o emprego autónomo en Galicia

PONTEVEDRA> “Claves para impulsar o emprego autónomo en Galicia”. Ese foi o lema do encontro organizado esta mañá pola Asociación de Autónomos e Pequenas Empresas de Galicia. Unha xornada que serviu para achegar solucións aos problemas que existen dentro de este sector, así como para formar e informar das liñas de apoio existentes na actualidade a todos empresarios da comarca.

Achegar aos autónomos as liñas de apoio que a Xunta de Galicia ten a súa disposición. Ese era o obxectivo principal desta xornada. Un encontro organizado pola Asociación de Autónomos e Pequenas Empresas de Galicia e na que se presentaron as claves para impulsar o emprego neste sector.

A formación é un dos piares principais á hora de impulsar o emprego autónomo e, por iso, é fundamental facilitarlles a todos eles a máxima información posible con respecto as liñas de apoio e axudas dispoñibles.

En pouco máis de 10 anos o número de autónomos en Galicia descendeu en máis de 27.000 persoas. En Pontevedra, os datos reducíronse entre 2008 e 2019 nun 10%. Sen embargo, a nosa comunidade segue estando por riba da media española.

A Directora Xerente da Fundación Pública Galega da Formación para o Traballo, Rosanna López;  o Técnico da Secretaría Xeral de Emprego e Secretario da Mesa do Autónomo, José Martínez Casal; e o Presidente do Consello Galego de Economistas, Miguel Ángel Vázquez Taín, foron algunhas das autoridades que participaron nesta xornada de APE Galicia.