Núñez Feijóo chama aos seus a unha campaña que ‘non moleste’ e que destaque o que une aos galegos

[

PONTEVEDRA> Tamén comezou a súa campaña en Pontevedra o Partido Popular. Onte, o presidente do partido en Galicia participou da Xunta Directiva Provincial da formación. Nunha sala ateigada de simpatizantes, Alberto Núñez Feijóo trasladou aos seus as claves para desenvolver esta campaña. A súa intención é non molestar á xente e poñer en valor o que une ás persoas.

O Partido Popular exhibiu onte músculo en Pontevedra. Alberto Núñez Feijóo reafirmou o seu poder de convocatoria, enchendo a sala onde se celebrou a Xunta Directiva Provincial da formación. O presidente galego trasladou aos seus unha das claves desta campaña: non molestar.

Unha vez máis, Núñez Feijóo presentou o proxecto popular como o único garante da estabilidade e da unión. Falou de fuxir do enfrontamento, e de presentar unha opción que una á maioría dos galegos.

O presidente dos populares tamén destacou o peso que, asegurou, terá Galicia durante a súa campaña. Para Alberto Núñez Feijóo, a poboación galega e os seus intereses deben estar por riba do Partido Popular.

En canto aos posibles pactos con Ciudadanos, Núñez Feijóo non pechou a porta a atopar puntos de encontro. Si manifestou a súa preferencia a falar cos líderes galegos, en lugar de tratar as condicións coa dirección de Madrid. Tamén sinalou que o obxectivo desta posible unión debe ser blidar un goberno que non dependa de nacionalistas, das distintas Mareas ou de independentistas.