O TSXG ratifica a condena a prisión permanente revisable para o Chicle

BARBANZA> O Tribunal Superior de Xustiza de Galicia confirma a pena a prisión permanente revisable para o Chicle polo asasinato de Diana Quer. Desestima así o recurso presentado pola defensa que pedía a anulación do xuízo por presuntas irregularidade e vulneración dos dereitos do acusado.

A sala do Civil e do Penal do Tribunal Superior de Xustiza de Galicia desestimou o recurso presentado pola defensa de José Enrique Abuín ‘O Chicle’ contra a sentenza ditada en decembro pola Audiencia Provincial da Coruña que o condenaba  a prisión permanente revisable e dez anos de liberdade vixiada polo asasinato con aleivosía de Diana Quer.

O tribunal subliña que non existe dúbida da realidade duns feitos que foron debidamente acreditados na sentenza de primeira instancia como o móbil sexual do secuestro ó descartarse a tese de que a vítima foi fora trasladada sen vida á nave de Asados onde apareceu o corpo.

Os maxistrados do superior insisten en que non se trata dunha condena arbitraria nin se vulnera o dereito á presunción de inocencia, tal e como facía constar a defensa no recurso, posto que os feitos fíxanse sobre a base da proba indiciaria. Na súa resolución indican tamén que non existen datos obxectivos que apunten á parcialidade do xurado do que a defensa afirmou que estaba condicionado pola presión mediática do caso.

De igual modo, cuestionaba a obxectividade dos médicos forenses, dos axentes da Garda Civil e dos peritos informáticos; algo que o tribunal descarta tanto agora como anteriormente posto que estas cuestións xa foron resoltas nun auto previo que non foi recorrido.

DEIXAR UNHA RESPOSTA

Por favor, engade un comentario!
Por favor, engade o teu nome aquí