CAMBADOS> Cambados une o comercio e a arte co primeiro rueiro de artistas. 16 mozos creadores exporán as súas obras en diferentes establecementos da vila. O obxectivo é fomentar as vendas á vez que os artistas amosan as súas obras.
Dous estudantes de belas artes, Lara Cores e Luís Vilanova, poñen en marcha en Cambados unha iniciativa novidosa, o rueiro de artistas. Unha exposición con obras de diferentes artistas galegos que estarán dispoñibles en comercios da vila. O obxectivo é que os creadores poidan mostrar as súas obras á vez que axudan a incentivar as compras nos establecementos.
No rueiro de artistas participan 22 establecementos e 16 creadores. Os mozos e mozas son alumnos do último curso de belas artes que con estas mostras dan a coñecer as súas creacións.
Os estudantes quixeron compartir esta iniciativa co comercio local conscientes do difícil momento que atravesa o sector. Para os comerciantes de Cambados esta iniciativa é un aliciente máis para que a xente acuda ós seus negocios.
Todos os comercios participantes poden visitarse a pé, coincidindo coa ruta do camiño de Santiago. As persoas que visiten todas as obras entrarán no sorteo dun vale de 150 euros.
