Rianxo garante a protección dos terreos públicos ante posibles danos por mor das cortas forestais

RIANXO> O concello de Rianxo conta xa cunha ordenanza de protección de camiños públicos. A intención é garantir a reposición dos terreos públicos ó seu estado inicial cando se executen cortas ou traballos forestais que requiran o paso de maquinaria pesada.

O pleno rianxeiro deu luz verde a unha nova ordenanza municipal na que o goberno levaba tempo traballando para garantir a protección de camiños públicos e parcelas municipais afectadas polo paso de maquinaria pesada no caso de cortas e traballos forestais. As empresas encargadas destes labores terán que dar aviso previo ó concello quen se encargará de comprobar o estado inicial dos camiños, así como depositar unha fianza para asumir posibles danos.

A ordenanza establece tamén sancións aínda que só en caso de incumprimento do aviso ou depósito da fianza ou de que non se repoñan os terreos afectados ó seu estado inicial.

O alcalde aclarou que se trata dunha medida preventiva e, en ningún caso, recadatoria posto que quedan exentos os particulares que realicen traballos menores de poda ou desbroce.