CAMBADOS> A conselleira do Mar visita a empresa cambadesa Algas La Patrona como un exemplo de sustentabilidade e diversificación do sector do mar. A fábrica obtén as algas da ría de Arousa e as elabora para o seu consumo. A conselleira tamén anunciou que a recollida destes produtos do mar acaba de regularse para que as empresas interesadas poidan presentar os seus plans de explotación.
Dende o ano 2018, unha empresas de Cambados dedícase ao procesado e elaboración de algas. Un produto típico dos nosos mares pero con moi pouca presenza na nosa alimentación diaria. Pola súa forma de traballar sostible e ecolóxica e como exemplo de diversificación do sector do mar, a consellería quixo recoñecer a súa labor.
A empresa, composta por tres traballadoras, merca as algas na Illa de Arousa e encárgase do seu lavado, procesado e elaboración ata convertelas nun alimento apto para o consumo.
A empresa mira cara o futuro con novos proxectos cos que fomentar o consumo de algas. Un deles ten que ver coa recollida deste produto directamente do mar por parte das empresas e non só das confrarías. Uns traballos que serán posibles coa nova regularización da Consellería do Mar.
A empresa agradece as axudas do Galp para poder adquirir equipamentos cos que desenvolver e ampliar a súa actividade. Ademais do mercado nacional dende La Patrona tamén miran ao exterior con clientes en países como Alemaña ou Suíza.
