SANXENXO> Sanxenxo prepárase para un dos seus grandes eventos deportivos deste ano, os torneos internacionais de tenis organizados polo Círculo Cultural Deportivo. Vai comezar este vindeiro domingo, nas categorías xuvenil e cadete. A presentación do campionato contou cun convidado de excepción, o extenista Emilio Sánchez Vicario.
24 países daranse cita en Sanxenxo a partir deste domingo nos torneos internacionais de tenis impulsados polo Círculo Cultural Deportivo Sanxenxo. A entidade presentou un torneo que se vai desenvolver nas súas renovadas instalacións nas categorías xuvenil e cadete. Este ano será de grao 1, a máxima categoría mundial.
As probas xuvenís celebran a súa XIX edición e o torneo cadete, a XIII. Participarán en total uns 130 xogadores por torneo, en fases previa e final, masculino e feminino e dobres. Unha cita que pon a Sanxenxo no mapa tenístico e que contou co extenista Emilio Sánchez Vicario como padriño.
O torneo conta co apoio de distintas administracións, entre elas o propio Concello e a Deputación de Pontevedra.
Os partidos vanse disputar nestas pistas, que foron inauguradas este mesmo verán. Gozan dunhas características técnicas de primeiro nivel.