PONTEVEDRA> Pontevedra continúa avanzando na tramitación dos seus orzamentos para 2022. A Xunta de Goberno Local aprobou esta mañá as Contas. Acto seguido, foron entregadas á oposición, que dispón de tres días para presentar emendas. O orzamento de 2022 supera os 85,9 millóns, o que supón un incremento de 5 millóns ao respecto de 2021.
Os orzamentos de Pontevedra para o ano 2022 continúan avanzando na súa tramitación. Esta mañá, a Xunta de Goberno Local deulle luz verde ás contas. Deste xeito, comeza o proceso para que o documento poida ser debatido nun pleno extraordinario da Corporación municipal que se celebrará o vindeiro 7 de xaneiro. As Contas de 2022 superan os 85,9 millóns, o que supón un incremento de 5 millóns ao respecto de 2021. O goberno local fala dunhas contas expansivas, baseadas –din- a aposta pola mellora dos servizos públicos e no incremento da partida de investimentos.
Salienta a mellora do servizo de limpeza e tratamento de residuos municipais. En relación aos investimentos, aumentan en case un 20%, acadando os 12 millóns no ano vindeiro
Os grupos da oposición recibiron xa hoxe o borrador das contas. Teñen 3 días hábiles para presentar emendas. Superado ese prazo, o xoves, celebrarase unha comisión de dúbidas e o día 3 de xaneiro, a de ditame.
Os populares, pola súa banda, solicitan a comparecencia de tódolos concelleiros do goberno do BNG e PSdeG para explica-las partidas orzamentarias de cada área. Din que sería un bo exercicio de transparencia que lles permitiría estudar en detalle os pormenores dos orzamentos.