BOIRO> Hai uns días facíase pública unha reunión da conselleira de Política Social, Fabiola García, cun grupo de empresarios que promoven a construción dunha residencia privada para a terceira idade en Boiro con preto de oitenta prazas e que incluiría tamén un centro de día.
A residencia emprazaríase nun edificio situado no lugar de Fonte Lomba, na parroquia de Lampón. Unha proposta da que é tamén coñecedor o Concello dende hai tempo, que aplaude a iniciativa.
Aínda así o alcalde, Xosé Ramón Romero, indicou que seguirá a traballar por conseguir unha residencia pública para Boiro, cumprindo así o compromiso dado ós veciños.
Cómpre lembrar que o propio Concello puxo hai uns anos a disposición da Xunta una parcela municipal de preto de seis mil metros cadrados de superficie, próxima ó parque da Cachada, para construir alí a residencia. Unha proposta pola que obtivo, polo de agora, a calada por resposta por parte de Política Social, que decidiu finalmente construila en Ribeira
BNG
O BNG quixo tamén mostrar a súa postura en relación a este tema. Os nacionalistas seguen a insistir na necesidade de contar cunha residencia pública, para garantir así o dereito á saúde e ós coidados das persoas maiores nas mellores condicións.
Consideran que a iniciativa privada non é a mellor opción, pois responde a fins lucrativos, xerando maiores desigualdades entre os que a poden pagar e os que non.
Por esta razón instan ó equipo de goberno, ó que acusaron de falta de capacidade, a acelerar as xestións para conseguir dunha vez por todas unha residencia pública.
Os nacionalistas anunciaron ademais que comezarán unha campaña para reclamar unha residencia de maiores pública para Boiro.