Ribadumia despídese do Tinto pensando xa na celebración dos seus 50 anos en 2023

RIBADUMIA> Ribadumia despediu por todo o alto o regreso da Festa do Tinto do Salnés. Centos e centos de persoas déronse cita nun evento que, tras dous anos, puido recupera-la súa esencia. Ademais do nomeamento de valedores e a entrega de premios da cata, tampouco faltaron as orquestras, a gastronomía e moitas outras actividades pensadas para tódolos públicos.

Ribadumia volveu gozar do Tinto e fíxoo, ademais, por todo o alto. Logo do parón da pandemia, a festa volveu recuperando todo o seu esplendor, con centos de persoas rendendo tributo ao produto estrela dunha festa que acariña o medio século de historia.

Nesta edición foron nomeados sete valedores, que recibiron o seu correspodente diploma acreditativo. Foi nun acto no que tamén, coa cata final, se desvelaron os nomes dos gañadores do concurso de viños deste ano. A xornalista Fátima Mella foi a encargada de da-lo pregón. Deu 49 razóns para vivir este festa, unha por cada edición que leva ás súas costas.

Tamén volveu o xantar de confraternidade, con polbo, carne ao caldeiro e os clásicos amorodos con tinto. No concello celebran a recuperación do evento, tras dous anos moi duros.

A festa trouxo tamén de volta a música á localidade, con charangas e moita animación polas rúas de Barrantes. Tamén o regreso das grandes orquestras, que congregaron a centos de persoas. Unha vez superada esta edición, en Ribadumia pensan xa na do ano que vén: será, sen dúbida, unha das máis especiais dos últimos tempos, ao conmemorarse os 50 anos dunha festa referente na nosa contorna.