PONTEVEDRA> Fomentar a práctica do deporte e facelo, ademais, dun xeito inclusivo. Este é un dos obxectivos do campus de verán do Club Amigos do Baloncesto que se está a desenvolver en Pontevedra. Este ano estrearon iniciativa, o CAB Social, con usuarios dos colectivos Down Pontevedra Xuntos e Amizade. No seu marco, todos os participantes adestran xuntos, achegándose ás diferentes realidades.
Facer da práctica deportiva unha actividade inclusiva é unha aposta firme do Club de Amigos do Baloncesto. Estes días están a desenvolver o seu campus de verán estreando, ademais, novo proxecto: o CAB Social.
Na cancha non hai distincións. Os participantes do CAB e os usuarios das dúas asociacións conviven e gozan do deporte, compartindo diversión e aprendizaxe.
O proxecto é ambicioso. Este é o seu primeiro ano, pero dende o CAB xa pensan en facelo medrar. Traballan por exemplo na organización dun torneo con todas as asociación de Down Galicia.
Porque o obxectivo non é só facer deporte ou converterse no mellor xogador de baloncesto. É achegar aos participantes ás diferentes realidades.
E parece que a mensaxe está a calar ben fondo.