PONTEVEDRA> No concello de Pontevedra preocupa, e moito, a situación do río Lérez. O goberno local advirte de que non é compatible a captación de auga de ENCE co abastecemento á poboación. De feito, non desbotan que nunhas semanas haxa que botar man do encoro do Pontillón do Castro.
No concello de Pontevedra, levan un tempo advertindo da rapidez á que estaba baixando o caudal do río Lérez. Situación que acelerou esta semana. Segundo as medicións municipais e da empresa concesionaria, este xoves o nivel mínimo é de 0,87 metros cúbicos por segundo e o mércores foi de 1,04. O caudal mínimo debería ser de 1,55.
Estes datos levaron á Xunta a solicitar a ENCE que parara a súa actividade. Segundo Da Silva,o abastecemento da poboación é prioritario e incompatible co consumo da pasteira.
A día de hoxe, ENCE recoñece que consume 12 millóns de metros cúbicos por ano, aínda que pola súa concesión podería chegar ata os 17 millóns. Cifra que triplica o que captan do Lérez todos os municipios que se abastecen del: Pontevedra, Poio, Marín, Sanxenxo e Bueu.
Dende Pontevedra fan tamén un chamamento aos outros concellos que se abastecen do Lérez. É necesario tomar medidas de aforro de auga e tamén revisar os rendementos das súas redes de subministro para evitar perdas. No 2020, o rendemento de Sanxenxo era do 63,3% mentres que o da capital é do 91,81%. Segundo a normativa, non pode baixar do 80%.
Da Silva tamén pediu á cidadanía que eviten o despilfarro de auga. A vindeira semana, o concello publicará un bando municipal con recomendacións e tamén prohibicións no caso de seca extrema. De prolongarse esta situación, non desbotan ter que recorrer ao encoro do Pontillón.
