BOIRO> O concello de Boiro levará o servizo do punto limpo a tódalas parroquias do municipio. Con este fin, ven de adquirir dous puntos móbiles que se desprazarán por tódolos núcleos de xeito quincenal para facilitar a reciclaxe a tódolos veciños.
O programa ‘Reciclaxe en Movemento’ percorrerá os distintos núcleos de poboación de Boiro achegando o punto limpo ás parroquias. Deste xeito, a veciñanza poderá depositar os seus residuos de xeito selectivo sen necesidade de desprazarse ata o polígono de Espiñeira.
Os dous puntos móbiles dispoñen de sete bocas de residuos para a recollida de lámpadas, téxtil, xoguetes, pila e baterías ou outros materiais que non se poden depositar nos contedores habituais. A intención da concellería de Medio Ambiente é poñer en marcha o programa a mediados do mes de outubro. Os puntos móbiles rotarán cada dúas semanas excepto nas datas de Nadal que se instalarán nas zonas máis poboadas.
