PONTEVEDRA> Desaparece un padexeiro mentres adestraba no río Lérez, en Pontevedra. Varias testemuñas deron a voz de alarma ao redor do mediodía. A piragua do home envorcou e, aínda que nun primeiro momento conseguiu agarrarse á embarcación e pedir axuda, finalmente afundiu. Dende entón, despregouse un dispositivo de busca para intentar localizalo.
Ao redor das 12 e media do mediodía unha testemuña daba a voz de alarma: un padexeiro caera ao río Lérez e pedía axuda.
Pouco despois, o home de 49 anos e pertencente ao Club Naval de Pontevedra, afundíase no río na zona entre as pontes do Burgo e das Correntes.
Na zona despregouse un dispositivo de busca para intentar localizar o padexeiro. Bombeiros, Garda Civil e Salvamento Marítimo peinaron o río na procura de calquera pista. Fóra, axentes da Policía Nacional e da Local e persoal sanitario tamén participaron no operativo.
Na busca tamén participaron compañeiros do desaparecido, membros do Club Naval de Pontevedra. Non dubidaron en subir ás súas piraguas para sumarse ao operativo.