PONTEVEDRA> Cuarta xornada de busca do padexeiro desaparecido no Lérez, en Pontevedra. Os efectivos que están a participar no operativo peinan todo o río, dende Bora ata a illa de Tambo. Un esforzo que ata o de agora non conseguiu ningún resultado e que se ve dificultado polas condicións meteorolóxicas destes días.
Cúmprense xa catro días dende que un padexeiro de 49 anos desaparecera no Lérez, no espazo entre as pontes das Correntes e do Burgo. Dende entón, un amplo dispositivo de busca peina o río.
Isto en superficie pero os mergulladores do Grupo Especial de Actividades Subacuáticas da Garda Civil e da unidade subacuática da Policía Autonómica están a realizar inmersións para comprobar os fondos do Lérez.
Un dispositivo de busca que se ve dificultado polas condicións meteorolóxicas destes días.
Ata o de agora estes esforzos non deron resultado. Dende o concello explican que o operativo continuará en marcha mentres os expertos o recomenden.
O padexeiro desapareceu no mediodía do venres cando remaba na zona entre as pontes do Burgo e das Correntes. A súa piragua envorcou e, aínda que nun principio conseguiu agarrarse á embarcación, rematou por afundir.
