PONTEVEDRA> Xa hai data para o inicio da reforma do vial perimetral da praza de Barcelos, en Pontevedra. Será o vindeiro 16 de xaneiro, despois das datas do Nadal e da primeira semana de rebaixas. Teñen un prazo de execución dun ano e realizaranse en dez fases, comezando xunto ao colexio. A intención do concello é evitar ao máximo as molestias á veciñanza.
Pontevedra comezará o 2023 co inicio dunha das grandes obras comprometidas na cidade. O 16 de xaneiro arrancará a reforma do vial perimetral da praza de Barcelos.
A obra ten un prazo de execución dun ano. Dividirase en dez fases, deseñadas conxuntamente entre a empresa adxudicataria, a Policía Local e os servizos técnicos municipais.
Os traballos comezarán pola zona máis próxima ao colexio. Esta será a única fase que non afectará ao tráfico. As etapas sucesivas, ata chegar á entrada dende a rúa Perfecto Feijóo, obrigarán á reordenación da circulación.
En canto ao traslado do transformador eléctrico fóra das instalacións do colexio de Barcelos, realizarase durante o verán, para non afectar á actividade do centro.
A reforma dos viais perimetrais de Barcelos foi licitada por 1 millón 941 mil euros. A esta contía hai que sumar os 176.000 que custará o traslado do transformador, que asumirá a empresa como mellora do contrato.
