MADRID> A ruta xacobea Mar de Santiago presume do seu crecemento na súa presentación en Fitur. As catro vilas destacaron a gran repercusión que a ruta acadou nos seus escasos dous anos de vida. Para este 2023 enfocaranse no turismo relixioso, con gran demanda de visitantes que proveñen de vilas portuguesas como Fátima.
A pesar de ter tan só dous anos de vida, a ruta xacobea Mar de Santiago converteuse nunha das grandes alternativas do camiño de Santiago. A ruta non deixa de crecer cada ano e atopa en Fitur un escaparate único para continuar aumentando a súa demanda. Os concellos que a conforman centraron a súa presentación en Madrid nos grandes resultados que acadaron nestes dous anos e nos retos futuros.
Precisamente, o turismo relixioso será o que centre os esforzos de Mar de Santiago nas vindeiras datas. Dende a ruta xacobea atopan neste tipo de visitantes e, especialmente nos chegados dende Portugal, unha gran demanda.
Os concellos destacan as potencialidades da ruta Mar de Santiago. Unha experiencia que ten a súa orixe na tradición da traslatio.
A oportunidade de presentarse en Fitur axudou ao gran crecemento de Mar de Santiago, de aí que para os concellos sexa algo vital poder seguir promocionando a ruta en Madrid.
Tralo seu paso por Fitur, os representantes de Mar de Santiago desprazaranse a Fátima para intentar pechar acordos na vila portuguesa. Dentro desta busca do turismo relixioso, dende a ruta xacobea tamén enfocaranse aos visitantes suramericanos.
