A Deputación de Pontevedra cualifica como moi positivo o seu paso por Fitur

Pontevedra> A deputación de Pontevedra fai un balance moi positivo do seu paso por Fitur. A presidenta Carmela Silva destaca a gran acollida das súas presentacións e a repercusión acadada polos seus vídeos. Para este 2023 anuncia que a camapña A Orixe estenderase ás redes sociais e a algúns espazos moi concorridos como o Metro de Madrid.

A deputación de Pontevedra tivo unha gran actividade na edición de Fitur celebrada a pasada semana. Ademais de presentar a súa campaña A Orixe, a administración provincial estivo presente noutras presentacións de Tour España, de Fitur Screem, de Fitur Sport e mantivo numerosas reunións con empresas e outras administracións. Dende a Deputación valoran o seu paso por Ifema como moi positivo.

A presentación en Fitur Screem de Pontevedra foi a máis visitada dentro de ese espazo e a de Fitur Sport recibiu un premio como exemplo de boas prácticas. En canto aos encontros, a deputación reuniuse coa ministra Reyes Maroto, para formar parte dos plan de sustentabilidade, e co presidente de Paradores de España, para aumentar o seu investimento nos paradores da provincia. Á marxe dos actos e encontros, os vídeos presentados tamén tiveron moita repercusión.

Tralo balance de Fitur, a presidenta tamén anunciou as actividades de promoción que porán en marcha neste 2023. Ampliando a campaña A Orixe ás redes sociais e a outros espazos moi concorridos como o Metro de Madrid.

Á marxe da campaña, a deputación tamén anunciou no acto que lanzará unha nova liña de axudas cun orzamento de máis de 300 mil euros para potenciar as redes de oficinas de Turismo Rías Baixas.