SANXENXO> Telmo Martín quere reforzar a gastronomía e a protección á natureza e ao patrimonio da vila en caso de saír reelixido. Entre as súas promesas destacan a construción dun centro gastronómico das Rías Baixas, a musealización do Castro da Lanzada e a humanización de Vilalonga.
O alcalde de Sanxenxo organizou esta mañá un encontro con empresarios da vila para adiantar algunha das propostas do que será o seu programa electoral. Tras 6 anos liderando o concello, Telmo Martín sinala os novos obxectivos que terá por diante no caso de saír reelixido. As súas propostas pasan por potenciar a gastronomía, a natureza e o patrimonio así como mellorar ás rúas e os servizos da vila.
Estas propostas inclúen a creación dun centro gastronómico das Rías Baixas no Pazo de Quintáns, un centro de hostalería e turismo no antigo colexio de Vilalonga e a renovación do mercado de Sanxenxo. En canto a conservación e posta en valor do patrimonio cultural e natural, Telmo Martín propón musealizar e poñer en valor a contorna da Torre da Lanzada e recuperar o litoral da vila na ría de Arousa. En canto a infraestruturas destaca a humanización do centro de Vilalonga, a reorganización do espazo portuario de Portonovo e ás reforma do porto deportivo de Sanxenxo e do colexio Florida. Proxectos que algúns xa están en marcha ou proxectados e que o presidente de PPdeG pon en valor destacando ao seu candidato na vila.
Ademais destes proxectos, a vila xa pechou dous acordos para os vindeiros anos: Un convenio con Poio para a explotación e execución de actuacións de saneamento e depuradora cun orzamento de 17 millóns de euros, e a adxudicación do servizo da auga na vila a Espina e Delfín, que conta cun compromiso por parte da empresa de desenvolver en Sanxenxo diferentes actuacións cuns investimentos que superan os 11 millóns de euros.
