PONTEVEDRA> No mes de xullo, o Partido Popular tomará o relevo no goberno da Deputación de Pontevedra. Hai uns días a formación pedía de xeito público ao xa executivo en funcións, o bipartito PSdeG-BNG, que paralizara calquera decisión que puidera comprometer ao próximo goberno. Como por exemplo, a reunión do xurado que ten que escoller o proxecto para rehabilitar Santa Clara. Hoxe o vicepresidente en funcións cualificaba esta demanda de inaudita. Ademais, o nacionalista César Mosquera aseguraba que non deixarán nada comprometido en marcha.
Con esta mensaxe, o vicepresidente en funcións da Deputación de Pontevedra respondeu ao comunicado emitido esta semana polo Partido Popular. A formación pedía ao goberno saínte que non tomara decisións que puideran comprometer ao próximo executivo do PP.
Na nota de prensa, o Partido Popular poñía como exemplo o concurso para escoller o anteproxecto para a rehabilitación de Santa Clara e a súa incorporación ao Museo de Pontevedra. E reclamaban a paralización da reunión do xurado prevista para o día 5.
Mosquera recordou que a rehabilitación de Santa Clara contou co voto a favor dos deputados do PP no pleno provincial. En canto ao proxecto para recuperar os edificios centrais do Museo, o vicepresidente en funcións apuntou que conta cunha subvención de 3 millóns de euros e co visto bo de Patrimonio, aínda que recoñeceu o futuro goberno podería paralizalo.
