O GROVE> Xa coñecemos as catro formacións gañadoras do concurso Interritmos: Sons do Rural. Son Leni Pérez e Roberto Comesaña, Fixe Trío, Maghúa e As Lembranzas.
A final celebrouse este sábado no Náutico de San Vicente do Grove. Durante toda a xornada, dez grupos e artistas pasaron polo escenario para presentar as súas propostas musicais nesta iniciativa impulsada polos GDR do Salnés-Ulla-Umia, Ribeira Sacra-Courel, Comarca de Lugo, a Asociación Deloa e Asdecomor.
A xornada do sábado completouse coa palestra ‘Os sons no directo’, que abordou os segredos das mesas de son da man dos técnicos de son Ovidi Graells e Fernando Campos.
Agora, os catro grupos escollidos polo xurado neste concurso Interritmos realizarán un circuíto musical en vivo polos territorios dos grupos de desenvolvemento rural que organizan o proxecto. Así, o 1 de xullo actuarán no Paseo do Río Narla, en Friol. En setembro farano en dúas datas: o 15 na praza pública da Ponte Carreira, en Frades, e o 22 no Pazo de Goiáns, en Boiro. Finalmente, en outubro será o día 6 nas Nogais e o 7 en Samos.
