BOIRO> O pazo de Goiáns acolleu esta mañá o acto de clausura do programa Ludieduca promovido pola Cruz Vermella e Jealsa. Máis de 1300 alumnos beneficiáronse deste programa ó longo dos seus dez anos de traxectoria.
Máis de 200 escolares de Boiro e da Pobra participaron esta mañá na festa de clausura do programa Ludieduca que conmemora este ano o seu décimo aniversario. O acto, celebrado no Pazo de Goiáns, serviu para realizar un repaso do que supuxo esta iniciativa, a través duns videos protagonizados por antigos alumnos, hoxe xa adultos, que lembraron a importancia deste programa na súa traxectoria vital.
O obxectivo deste programa, impartido por voluntarios da Cruz Vermella, é fomentar a educación en valores entre os cativos para construír unha mellor sociedade de cara ó futuro. Nestes dez anos xa foron máis de 1300 os cativos que pasaron por este programa que ten vocación de continuidade por moitos anos máis.
