NOIA> O obxectivo desta travesía solidaria a nado que une o porto de Testal e o Freixo non é outro que lograr a inclusión e a integración das persoas con algún tipo de diversidade funcional, sexa cal sexa, no deporte.
Non é tanto pois unha cita cun carácter competitivo, senón o que se busca é máis unha xornada de festa.
A actividade que organiza a Asociación Deportiva Adeco-Dea, en colaboración co Concello, terá lugar o 15 de agosto, a partir das cinco da tarde.
Nela agárdase unha participación dunhas cen persoas. Dende o Concello fan unha chamada a participar nesta cita que este ano chega xa a súa 21 edición.
As inscricións seguen abertas a través da web de emesports. A cota de inscrición é de dez euros.
As prazas estarán limitadas a un máximo de cen, debido a cuestións de seguridade para tódolos participantes. Un aspecto que dende a organización pretenden controlar ó máximo para que non se produza ningún tipo de incidente.
