RIBEIRA> O Partido Socialista denuncia a falla de persoal e as deficiencias nas instalacións do hospital do Barbanza. O seu compromiso electoral apunta a unha mellora na xestión para reducir as listas de espera e incrementar o número de profesionais.
A candidata socialista, María Outeiral, acompañada doutros membros do partido presentaba esta mañá algunhas das medidas do seu programa en materia sanitaria. Dende o PSdeG denuncian a situación do hospital do Barbanza con importantes deficiencias nas súas instalacións, referidas principalmente a falla de espazo e problemas de humidades e filtracións.
Á marxe das eivas materiais denuncian que o principal problema vén derivado da falla de persoal que se traduce nas listas de agarda máis longas de Galicia.
Ademais de comprometerse a incrementar as contratacións, non só de especialista senón tamén en atención primaria, apostan por mellorar as condicións laborais dos médicos.
