BARBANZA/NOIA> O paso da borrasca Kirk deixou un regueiro de incidencias nas comarcas do Barbanza e Muros e Noia.
Unha das máis significativas producíase xa a ultima hora da tarde de onte en Porto do Son.
Alí o forte vento, con rachas de máis de cen quilómetros por hora, tiraba varias das paredes do pavillón polideportivo do Instituto Fraga do Noivo.
Por fortuna non houbo vítimas, xa que o centro educativo atopábase pechado nese momento, e esta mañá, por precaución, acordouse que non houbera clase.
Tamén se suspenderon as clases no colexio de Outes, debido á inundación da planta baixa.
Non foron os únicos incidentes, ó longo da noite e durante as primeiras horas desta mañá, nas peores horas do Kirk, foron numerosas as chamadas ós teléfonos de emerxencias pola caída de arbores, que impedían o tránsito polas estradas, e á presenza de numerosas bolsas de auga, debido á acumulación intensa das precipitacións e desbordamentos de ríos, como os que afectaron ó río Té, en Rianxo, en varios puntos, que obrigaron a pechar viais na Laxe, batán e As Miráns, entre outros.
Tamén houbo desprendementos de terra, como o que afectou ó corredor Brión-Noia, á altura do concello de Lousame, ou caída de varios noiros na autovía do Barbanza, pero de menor incidencia, e non dificultaron a correcta circulación nesta estrada.
Os cortes no subministro eléctrico tamén foron unha constante durante a mañá, afectando a práctica totalidade dos concellos, máis relevantes en Noia, Lousame ou Ribeira.
No mar a situación durante toda a xornada tamén foi preocupante. A practica totalidade da flota estivo amarrada a porto e non saíu a traballar na xornada de hoxe como é o caso de Ribeira.
Co paso das horas, e xa contra o mediodía, a situación foi mellorando e as precipitacións e fortes rachas de vento foron perdendo intensidade.
