NOIA> Noia acollerá entre o 30 de outubro e o 9 de novembro a vixésimo quinta edición da súa Mostra de Curtas. Medio cento de cintas participarán no certame. Foron seleccionadas entre os máis de 1200 traballos presentados.
A Concellería de Cultura de Noia ultima os preparativos para a Mostra de Curtas Vila de Noia que dará comezo o 30 de outubro. Nesta vixésimo quinta edición competirá un total de 46 curtas, das máis de 1200 que se presentaron. Coincidindo co 25 aniversario, a organización homenaxeará a todos aqueles que fixeron posible o nacemento e consolidación desta mostra que a día de hoxe converteuse xa nun referente a nivel nacional.
Ademais do pase dos títulos participantes na sección oficial destacan na programación os obradoiros de Curta Cativa para os máis pequenos, a sección Cousas de Aquí dedicada ó mundo do mar e a proxección de dúas longametraxes.
O cartel deste ano é obra de Santiago Avilés que pon o foco no espectador e a capacidade de asombro do cinema a través dos ollos dun nenos.
O peche da mostra terá lugar o día 9 coa gran gala de entrega de premios no Coliseo Noela.
