NOIA> Baixo o lema ‘Noia preto de ti’, a patronal noiesa desenvolverá dende este venres ata o 5 de xaneiro a súa tradicional campaña comercial de Nadal, coa que pretende incentivar as compras na localidade.
A campaña deste ano, na que participan un total de sesenta establecementos comerciais de todo tipo, vén cargada de importantes novidades. Unha delas, se cadra a máis importante, será o sorteo de catro iPhone 15.
Como en anos anteriores haberá tamén unha programación especial que incluirá animación musical polas rúas do casco histórico ó longo da campaña, tren infantil e a tradicional chocolatada no Curro.
Para o desenvolvemento da campaña, Noia Histórica conta tamén coa colaboración do Concello.
Dende o executivo incidiuse na aposta realizada, un ano máis, pola decoración, para darlle unha imaxe máis atractiva á vila durante esta época do ano e axudar así á dinamización do tecido comercial.
Ademais do Concello, colaboran tamén coa campaña a Xunta de Galicia e a Deputación de Coruña.
