A POBRA> A concellería de Servizos Sociais e o Centro Sociocomunitario da Pobra volven poñer en marcha o programa de Envellecemento Activo. Ofertaranse os cursos de musicoterapia e de estimulación cognitiva, divididos en dous semestres.
Como cada ano, o Centro Sociocomunitario da Pobra acollerá os cursos enmarcados no Programa de Envellecemento Activo. Comezarán o 4 de abril e desenvolveranse en dous semestres nos que se impartirán os talleres de memoria, a cargo de Cruz Vermella, e cursos de musicoterapia.
O obxectivo deste programa é previr o illamento social das persoas maiores co fin de retrasar o deterioro físico e, sobre todo cognitivo.
Os interesados xa se poden inscribir no propio centro sociocomunitario. O pasado ano o programa contou con máis de 50 participantes e non descartan ter que incrementar o número de prazas nesta edición ante o gran interese que espertan estas actividades.
